4/23/2013

حراسك مش ناسيين


حراسك مش ناسيين


ام الدنيا الولادة
60 سنة كاب و بيادة
بقت العبودية عبادة
و كلام الحاكم دين

و السجن كنيسة و جامع
و القِبلة حيطان و موانع
و النور محبوس مش طالع
من شباك الزنازين

و الحب شيطان كدّاب
و العدل مالوش أحباب
و الحق واخدنا غياب
في كشوف البني آدمين

و فـ لحظة ثورة صرخنا
و كسرنا الباب و خرجنا
و سجدنا للي نصرنا
و هتفنا في الميادين

و ملينا الدنيا أغاني
و ملينا القايمة أماني
و عزفنا كلام و معاني
عن حلم جابوه ملايين

و في وسط الضلمة فانوس
و بدال الشمس شموس
و بدال النوم فـ كابوس
أحلام بِخـَضار بساتين

و إدّينا الكل أمان
و وثقنا في ندل جبان
و وعدنا الوعد و خان
و قلب كل الموازين

و رجعنا لنفس الباب
لقيناه محروس بكلاب
و سَمانا ماليها ضباب
و طريقنا ماليه تعابين

يا وطن و الدم ماليك
و العار و الذُل كاسيك
لو كان الكل ناسيك
حرّاسك مش ناسيين

الصرخة الجاية طوفان
هتدوّي في كل ميدان
و هتضرب كالبركان
و ده وعد الحر و دين

بقلمي - بيتر ميشيل - 20 ابريل 2013

;