6/13/2012

تحرش لا إرادي

تحرش لا إرادي !!


انهاردة يوم التدوين ضد التحرش الجنسي في مصر ، و أكيد مفيش حد منكم هيقرا التدوينة و يقول في نفسه : تحرش إيه هي مصر فيها تحرش؟ و الا يكون بيشتغل نفسه
حاولت اكتب حاجة مفيدة في صميم الموضوع ، ملقتش غير كلام اصحاب المشكلة الاساسية وهم البنات ، و بما اني حاولت ادردش مع كام بنت في الموضوع دا و آخد رأيهم و اسمع منهم ، بما فيهم اختي .. بس للأسف الموضوع بالنسبالهم اسرار عسكرية ، الله يكون في عونهم شايلين في قلبهم و ساكتين ، فملقتش قدامي غير تدوينات شيرين ثابت في الموضوع دا ، لأنها جابت م الآخر



#ﻫﻞ_ﺗﻌﻠﻢ ﺍﻥ ﻏﺎﻟﺒﺎ ﺍﻱ ﺭﺍﺟﻞ ﻃﻮﻳﻞ ﻋﺮﻳﺾ ﻳﺸﻮﻑ ﺑﻨﺖ ﺑﺘﺘﻤﺴﻚ ﻣﻦ ﺃﻱ ﻣﻜﺎﻥ ﻓﻲ ﺟﺴﻤﻬﺎ ﺑﻴﺘﻔﺮّﺝ ﻭ ﻣﺎﺑﻴﺤﺎﻭﻟﺶ ﺣﺘﻰ ﻳﻘﻮﻝ ﻛﻠﻤﺔ ﻟﻠﻤُﺘﺤﺮّﺵ؟
#ﻫﻞ_ﺗﻌﻠﻢ ﺍﻥ ﺍﻟﺒﻨﺖ ﻣﻤﻜﻦ ﺟﺪﺍً ﻭﻫﻲ ﻣﺎﺷﻴﻪ ﻓﻲ ﺍﻟﺸﺎﺭﻉ ﺗﺴﻤﻊ ﺍﻱ ﻋﺒﺎﺭﺓ ﻋﻦ ﺍﻱ ﺗﻔﺎﺻﻴﻞ ﻓﻲ ﺟﺴﻤﻬﺎ ﻭ ﺣﺘﻰ ﻋﻦ ﺃﻋﻀﺎﺋﻬﺎ ﺍﻟﺘﻨﺎﺳﻠﻴﺔ؟
#هل_تعلم ان ممكن جداً واحدة (منقبة) تبقى واقفه في اوتوبيس و فجأه يتم التحرش بيها جسدياً و بكل الطرق الممكنة؟ و #هل_تعلم ان ماحدش بيتحرّك غالباً؟
#هل_تعلم انه من الغريب ان البنت تخرج وتروّح بيتها من غير ما تسمع كلمتين تلاتة عن اراء المواطنين في صدرها؟ وبكل الألفاظ الممكنة؟
#هل_تعلم ان لو لبس البنت مش عاجب سيادته بيعتبر التحرّش بيها حق مكتسب له؟ والغريب هو ان الناس تحاول تمنعه؟
#هل_تعلم ان في واحد غبي على تويتر بيسألني دلوقتي انتي واثقة من الكلام ده؟ و عرفتي منين؟
#هل_تعلم ان سواق الميكروباص مرة طلع نص جسمه من الشباك و شتم البنت كل الشتايم الأبيحة هي و أهلها عشان زرارين الشيميز بتاعها مفتوحين؟ ولما اتخانقت معاه شتمني وكان هايضربني و الرجاله اللي في الميكروباص مانطقوش؟
#هل_تعلم ان مرة واحد على سلّم المترو كان نازل جنبي بيقولي أقذر الألفاظ ولما شتمته كان هايضربني و اتلموا الناس يلوموني انا عشان صوتي عالي؟
#هل_تعلم ان في خان الخليلي شباب بيعاكسوا 24 ساعة بمنتهى قلة الادب ولو اتخانقت معاه هايبجّح و يقل ادبه اكتر ؟؟ عن تجربة
#هل_تعلم ان مافيش اي فرق بين قذارة المتحرشين مع المحجبة و قذارة المتحرشين مع غير المحجبة؟ وماينفعش حد يفتي في ده غير بنت جربت الحالتين.
#هل_تعلم ان ممكن جداً كل فترة تقابل واحد في الشارع قرر يفتح بنطلونه ويفرّج البنات على عضوه الذكري بالعافية؟
#هل_تعلم ان ما فيش بنت فاتها أي لفظ أبيح في شوارع مصر؟؟؟ كلنا بنسمع كل الكلام اللي ممكن أي حد يتخيله؟؟؟ وبنحمد ربنا انها جت على قد الكلام ومامدّش ايده؟؟؟
#هل_تعلم ان لو بنت مشيت في الفجالة هاتتعاكس بمعدّل كلمة مش محترمة كل 3 ثواني؟ و #هل_تعلم ان حصل مشكلة كبيرة بسبب كده من اسبوعين لإن اصحاب المحلات هرّبوا المتحرش اللي ضرب البنت لما شتمته؟
#هل_تعلم ان في واحد تاني على تويتر بيقولي مدام البنت لابسه محزّق يبقى التحرش عمل ايجابي؟
#هل_تعلم ان بعد عملية التحرّش بتفضل البنت متوترة و اطرافها ساقعة وفاقده القدرة على الكلام لمدة تعتمد على طريقة التحرش؟
#هل_تعلم ان أكتر من نص المُتحرش بهم بيتكسفوا يحكوا لأهلهم من كتر البشاعة؟ يعني لو حد قالك ترضاها لاختك وقلت اختي بتلبس محترم، لا يا بأف اختك بتتعجن بس انت اللي ماتعرفش.
#هل_تعلم ان في انسان على تويتر تعليقاً على موضوع خان الخليلي بيقولي: يبقى انتي عايزة كده ليه بتروحي هناك وانتي عارفة؟
#هل_تعلم ان اي بنت هاتقف في الشارع مستنية تركب او مستنية حد ، عادي جداً يعدي عليها عربيات تفتحلها الباب و البأف اللي جوة يدعوها للدخول؟ على اعتبار انها اكيد عاهرة الى ان يثبُت العكس؟ خصوصا في شارع خاتم المرسلين هرم
#هل_تعلم ان لما صديق حكالي على جرأة حرامي في سرقة الموبايلات في المترو جاتلي هيسترية ضحك؟ باعتباري مُت موتات احسن من دي بكتيييييييير !!! مستغرب من جرأته في سرقة موبايل. مش في سرقة قفشة!
#هل_تعلم ان تلت تربع رجالة تويتر منقسمين لنص شايفني ببالغ خصوصا على التحرش بالمحجبات ونص شايف ان البنت هي اللي غلطانة بسبب لبسها؟ وواحد عايز يوصفلي احساس الراجل لما بيشوف لبس ضيق؟
#هل_تعلم ان رداً على كلامي عن التحرش باستقبل بعض التحرشات على تويتر والفيسبوك حالاً؟
#هل_تعلم اني في ظل تلك الظروف العصيبة كل الذكور اللي قابلتهم في حياتي في اي مكان و في اي ظروف قالولي نفس الجملة؟ : انا عمري ما عاكست بنت
#هل_تعلم ان ممكن الناس تعدّي للمتحرّش الفاظه السافله و كلامه عن أكثر أجزاء جسم البنت خصوصية و… كمان بس لو البنت قالتله # يبهدلوها؟
#هل_تعلم ان بسبب صديقنا المتحرّش مكن بنات ما تخرجش من بيوتها اساساً و ما يمارسوش حياتهم بصورة طبيعية؟
#هل_تعلم ان صديقتي ما بتلبسش غير اللون الاسود بسبب التحرش ويوم ما تلوّن بيبقى يوم اسود عليها؟ مأتم إجباري
#هل_تعلم ان البنات ممكن تحكي حكايات التحرش دي للأبد ومش هايخلّصوا؟
#هل_تعلم ان الملايين من الشباب اللي بيتحرّشوا بالبنات دول هم نفس الناس اللي دخلت فيلم شارع الهرم هم هم اللي انتخبوا الحرية والعدالة؟
#هل_تعلم ان ربنا طلب منك تغض البصر؟ #هل_تعلم ؟ سؤال لمرضى تويتر
#هل_تعلم ان صديقتي اللي معاها اليكتريك في شنطتها سوّاق التاكسي اعجب بيها وقرر يخطفها في عز الضهر ووسط البشر والزحمة و ماسابهاش غير لما ضربته؟
#هل_تعلم ان في حد بيرد على موضوع ربنا قال غض البصر و بيقول، ماهه طلب من البنت برضه الاحتشام قولي الحقيقة كاملة؟ طيب اولاً التحرش بيطول كل انواع الملابس ثانيا وده الأهم، وانت مالك هي مابتسمعش كلام ربنا انت رايح تجيبله حقه يعني؟
#هل_تعلم ان التحرش الجنسي وصل كمان لمرحلة ان في بنات بتتحرش بالولاد؟ الحق يقال يعني.
#هل_تعلم ان في واحد على تويتر رده على موضوع الألفاظ السافلة في الشارع ان البنات كمان على تويتر بأوا بيشتموا براحتهم؟
#هل_تعلم ان لمسة إنسان لجسم فتاة مايعرفهاش بدون إرادتها بقت مسألة وجهة نظر؟
#هل_تعلم ان أول حادثة تحرّش كبيرة حصلتلي ومش هاقدر انساها ابداً كان معايا اتنين صاحباتي وكنّا في رابعة ابتدائي؟
#هل_تعلم اني اتعلمت الشتيمة على ايد المتحرشين؟
#هل_تعلم ان انا نفسي يبقى عندي اليكتريك؟ و اي سلاح ادافع بيه عن نفسي؟
#هل_تعلم ان أي حظيرة حيوانات فعلاً أكثر تحضراً من شوارع مصر المحروسة؟
#هل_تعلم انه راجل عنده 60 سنة ودقنه قد كده و بيفصص جسمها حتة حتة بمنتهى الوقاحة و بعدين يبصلها بقرف ويبص الناحية التانية؟
بطنكوا وجعتكوا؟ معلش، #هل_تعلم ان عادي جداً ان المتحرّش يضرب البنت من ورا في وسط الشارع متخذاً في ذلك تامر حسني قدوة و يضحك و يجري ولا كإنه عمل حاجة؟
#هل_تعلم ان ده اكتر يوم رجالة تويتر قلوا ادبهم عليا فيه؟ فعلاً الحقيقة بتوجع وكل واحد باين عليه جداً هو انهي نوع من البشر
#هل_تعلم ان انا مش ناوية اسكت؟ دوّر انت على حل انا مش عارفة اعمل غير اني ارغي
#هل_تعلم ان جملة التحرير وحش عشان فيه تحرش دي أكتر جملة كوميدية في الدنيا؟؟؟؟
#هل_تعلم اني في مرة من المرات بطرد الرجالة من عربية السيدات و عشان يغيظني نزل من الباب اللي انا واقفه عنده مع ان الباقي مفتوحين لمجرد انه يزنق نفسه فيا وهو نازل و يجري؟
#هل_تعلم ان المعاكسة الرقيقه اللي هي كلمة بسيطة حلوة وخلاص بقت رفاهية دلوقتي وانقرضت اساسا؟ واحدة صاحبتي فرحت جدا عشان واحد قالها شعرك زي موج البحر
#هل_تعلم ان رمسيس مكان مرعب ليا لإن اكيد اكيد هاتعرض للمعاكسة والتحرش هناك؟
#هل_تعلم انها مش محروسة ولا اللي فيها آمنين ولا اي حاجة من الأحلام دي من سنين طويلة؟
هو انت كنت فاكر الأمن مستتب؟ طب #هل_تعلم ان مرة واحد راكب موتوسيكل وقف قدامنا زماااان عند المدرسة واحنا بنات في اعدادي وفتح زراير القميص ولقيناه لابس تحته براه وبيضحكلنا ويشاورلنا واتفزعنا؟
#هل_تعلم ان التحرش الجنسي ده بيعتبر اغتصاب علني للبنت؟ عارف اختك اغتصبوها كام مرة؟
#هل_تعلم ان كل مابيعدي جنبي ولد في الشارع ايدي بتتحوّل لوضعية البوكس أوتوماتيك وضربات قلبي بتزيد؟
#هل_تعلم ان سن المتحرش بيكون 12 سنة فيما فوق؟
#هل_تعلم ان التحرش في الشارع و الجامعة والفيسبوك و تويتر و التليفون و الموبايل؟
#هل_تعلم ان انا ماعنديش حل للمشكلة دي؟ ماحدش يسألني تاني بأه !!! ماهه لو عندي حل ماكنتش قرفتكوا كده
#هل_تعلم ان كلهم في الشارع بقوا بالنسبة لي شبه بعض؟
#هل_تعلم ان كونك متحرش وحيوان ده بيفقدني أنا جُزء من إنسانيتي؟؟ انا ممكن أعمل مصيبة بسببك!
#هل_تعلم ان الكلام في الموضوع ده مكانش فكرتي؟ انا قررت كده لما لقيت اتنين من صاحباتي بالصدفة البحتة قدامي عالتايم لاين بيتكلموا عن التحرش وواحدة منهم في حالة انهيار.



الاروع في الموضوع هو رد الشاب محمد شريف على شيرين ، في مجموعة تغريدات في منتهى الروعة

هل تعلم ان البنات لما بتمشي بأي حاجة تدافع بيها عن جسمها، ده معناه انها شايفة نص الرجالة حيوانات والنص التاني كاوركات
هل تعلم ان اختك او مراتك أو بنتك بيخافوا يقولولك انهم اتعرضوا للتحرش علشان أول كلمة هتسمعها منك “أنا قولتلك ماتروحيش هناك” أو “أنا قلتلك ماتلبسيش كذا “
هل تعلم ان اختك او مراتك او بنتك بيخافوا يقولولك انهم اتعرضوا للتحرش علشان خايفين عليك اكتر من نفسهم ومش عايزينك تتخانق علشان متتضربش أو تروح في حديد بسببهم
هل تعلم ان بنات كتير لما بتفكر تدافع عن نفسها بتلاقي اللى يقولها “خلاص بقى ياأبلة”
هل تعلم ان بنات كتير لما بتفكر تدافع عن نفسها بتلاقي واحد “فاشخ ضبه” وبيضحك !!!!
هل تعلم إن الضحكة أو محاولة “فض المولد ” بتضايق البنت نفسيا أكتر من التحرش ذاته
هل تعلم ان بنات كتير لما بتفكر تدافع عن نفسها أمها او أبوها بيقولوها اوعي تعملى كده علشان ممكن يكون معاه حاجة يعورك بيها او يرشها عليكي
هل تعلم ان الأب أو الأم ممكن يقولوا لبنتهم “كويس انها جت على قد كده “
هل تعلم ان الرجالة وقت التحرش بيبقوا فاكرين الموضوع خناقة وبيكون اكبر همهم انهم يمشوا البنت من المكان … ويمشوا الحيوان اللى اتحرش بيها
هل تعلم ان معظم حالات التحرش بتكون حالات جماعية ، وان حالة التدخل من أي راجل بتكون حالة فردية … ده لوحصلت أصلا
هل تعلم ان البنت بتتربى طول عمرها ان محدش يحط ايده في ايدها غير خطيبها ، لكن في ناس كتير حطت ايدها في كل حتة في جسمها
هل تعلم ان لبس البنات ممكن يكون مستفز بس مش مبرر للتحرش أو انك تاخد مسكة … علشان في ناس كتير بتمشي على رجلها والبي ام والمرسيدس جنبهم وبيستفزوهم برضه بس مابيفكروش ياخدوا لفة … وفي ناس جعانة بتعدي على الجزارين ومنظر اللحمة بيستفزهم ومابيفكروش ياخدوا قطمة
هل تعلم ان لبس البنات المستفز هو ده اللى بتاخد عليه ثواب لما تغض بصرك
هل تعلم ان النقاب بقى بيتحسب من اللبس المستفز وان اللى لابسة نقاب مش عارفة تروح فين تاني
هل تعلم ان في رجالة كتير بتنزل من بيوتها في المناسبات الزحمة علشان يلحق مسكة وياخد نفسه و يروح تاني
هل تعلم ان السؤال بتاع “هو ايه اللى وداها هناك؟” او “ايه اللى جابها هنا؟”وصل لمرحلة “ايه اللى نزلها من بيتها أصلا ؟”
هل تعلم ان التحرش بيتم كتير مع بنت ماشية مع راجل وانه بياخد نصيبه هو كمان من التحرش
هل تعلم ان الراجل من دول لما بيشوف بنت في المترو مش راكبة مع السيدات بياخدها حجة للتحرش ولو اتكلمت بيقولها مش عاجبك متركبيش هنا
هل تعلم ان التحرش في المترو وصل لقلب عربية السيدات
هل تعلم ان المتحرش لو كان عازب هتلاقى واحد يقولك ده غلبان ومش لاقي يتجوز
هل تعلم ان المتحرش حتى لو كان متجوز هتلاقى واحد يقولك اكيد مراته مطلعة عينه
هل تعلم ان المعاكسة “المغازلة” غير التحرش خالص … وانها بتتناسب عكسيا مع التحرش، فين أيام المعاكسة بالصفارة وأيام “ايه اللى نزل الملايكة عالارض؟”
هل تعلم انك لما تغازل البنت ممكن تتبسط لكن لما تسمعها كلمتين قاذورات لا هي هتتبسط ولا انت هتتكيف
هل تعلم ان احنا اول ما وعينا عالدنيا اتعلمنا في مازنجر ان الست صدر وشكرا
هل تعلم انك لما تكون عايش في بلد هي الاولى في نسب التحرش يبقى البلد دي عندها مشكلة في رجالتها مش في بناتها
هل تعلم ان البنات فقدت الأمل في الرجالة وفي الرجولة بسببك وبسببي
هل تعلم إن من هنا ورايح مش هيجيب حق البنات .. غير البنات

هناك تعليق واحد:

  1. سؤال واحد بس ايه الحل بجد حرام اللى بيحصل ده .عارف معنى كلمة انتهاك حرمة انسان؟عارفين اصلا يعنى ايه حرمة؟عارف احساسك يكون ايه ان شخص يشوفك مجرد سلعة مباحة؟احنا كلنا دلوقتى بندرس او بنتعلم .هل المفروض اسيب شغلى او دراستى عشان حد انا ف نظره مجرد نكتة او مغامرة قصيرة ؟وعلى فكرة مش بتفرق اللبس اغلبنا تعرض للتحرش وهى لالبسة بنطلون او خمار ونقاب حتى .من شاب او راجل اكبر من جدها.والاسوأ لما يكون ملتحى وعامل فيها شيخ.ساعتها الماس كلها تتبرع للدفاع عنه
    بصراحة احنا امة ماتت ووجب قراءة الفاتحة لها
    احنا امة معندهاش اى مانع فى حدوث كل الموبقات مادامت بعيدا عن العيون المهم الواجهة تكون سليمة زى اللى مصر كل فترة يدهن واجهة بيته مع ان البيت اصلا آيل للسقوط وقريبا بإذن الله هيطربق علينا كلنا
    وعلى فكرة مهما كان نوع لبسى على فرض يعنى ده ميديش اى مخلوق حق انتهاك حرمتى
    نحن لسنا بجوارى ولا سبايا
    اتقوا اللله فى بنات الناس.اتقوا الله فى بناتكم
    اتقوا يوما ترجعون فيه الى الله وتذكروا المقولة القديمة "دقة بدقة ولو زدت لزاد السقا"افتكر ان كل لمسة او لفظ بيصدروا منك هيتردوا فى اعز الناس اليك

    ردحذف

;