5/07/2012

إيه يعني حمار

بقلمي : ....... قصيدة "إيه يعني حمار"


.
.
إيه يعني حمار ..
إيه يعني حصار ..
إيه يعني الفنجري و العصّار
إيه يعني كلاب مسعورة ، و نار
إيه يعني شاهين ..
إيه يعني بدين ..
إيه يعني كلابهم في الميادين
إيه يعني الجيش عبد السلاطين
إيه يعني الناس شايفة و ساكتين

إيه يعني الأقدام النجسة
بتدوس على أحلى و أنقى شباب
و ترفــّص بندالة و خِسـّة
لو قالوا عليه مجلس كداب
و السجن بيتعبّي في لحظة
لجل عيون المحروس ابو كاب
الزنازين مش هي الحبسة
لو ميت مليون قفل على الباب

إيه يعني هامان ..
إيه يعني عنان ..
إيه يعني الفرعون العيّان
إيه يعني بيحكمنا الطغيان
إيه يعني الكلب يكون سلطان

إيه يعني الكل يبات مظلوم
إيه يعني الكل يعيش مهموم
إيه يعني يكون حسّنا مكتوم
إيه يعني يا نسر تعيشلك يوم

إيه يعني البيانات اياها
مسمومة و مليانة بلاهة
و المؤتمرات و الميكروفونات
و سفاهة مابعديها سفاهة

إيه يعني لو انتو السابق ذكره بكل بلاه و سواده
ماهو احنا الشعب الصابر دايمًا على سارقه و جلاّده

احنا الصابرين ..
احنا القادرين ..
احنا الورد فـ كل البساتين
احنا الأحرار جوّة الزنازين
طايرين في سماها ولو مساجين
دايبين في ترابها عشان عاشقين

احنا الغارقين وسط الأحزان
و بنحلم بخضار البستان
و نقيد في الضلمة فانوس رمضان
و نولّع شمعة في كل مكان
و نلوّن سحابتكو السودة
و نخلي السما كل الألوان

احنا الثوّار ..
احنا الأحرار ..
احنا الشمس اللي في كل نهار
احنا اللي مبنخافش من النار
احنا اللي معانا عزيز جبّار
احنا الشوكة في حلق الخاين
و لجام في رقبة كل حمار

احنا الشعب الخط الأحمر
احنا الفايزين مهما تفكر
مهما تخطط مهما تدبر
برده هيسقـُط حُكم العسكر

بيتر ميشيل - 8 مايو 2012
مذبحة العباسية

اقرأ أيضًا :
خير جنود الأرض جيشنا
قصيدة "قتلوه يمّا" .. إهداء لروح الشهيد علاء عبد الهادي

هناك تعليق واحد:

;