9/11/2011

الشيخ إمام .. تراث لا يموت


الشيخ إمام .. تراث لا يموت _-_ Sheik Emam .. heritage never die




الشيخ إمام واسمه الحقيقي إمام محمد أحمد عيسى (2 يوليو 1918 - 7 يونيو 1995)، ولد في قرية أبو النمرس بمحافظة الجيزة لأسرة فقيرة و كان أول من يعيش لها من الذكور حيث مات منهم قبله سبعة ثم تلاه أخ وأخت. أصيب في السنة الأولى من عمره بالرمد الحبيبي وفقد بصره بسبب الجهل واستعمال الوصفات البلدية في علاج عينه، فقضى إمام طفولته في حفظ القرآن الكريم وكانت له ذاكرة قوية.

مزيد من التفاصيل في صفحته علي الويكيبيديا هنــــــــــــــــــــــــا

وفى عام 1962، حدث اللقاء التاريخي بين الشيخ إمام عيسى وأحمد فؤاد نجم رفيق دربه، وتم التعارف بين نجم والشيخ إمام عن طريق زميل لابن عم نجم كان جاراً للشيخ إمام، فعرض على نجم الذهاب للشيخ إمام والتعرف عليه، وبالفعل ذهب نجم للقاء الشيخ إمام وأعجب كلاهما بالآخر.

وعندما سأل نجم إمام لماذا لم يلحن أجابه الشيخ إمام أنه لا يجد كلاما يشجعه، وبدأت الثنائية بين الشيخ إمام وأحمد فؤاد نجم وتأسست شراكة دامت سنوات طويلة.

ذاع صيت الثنائي نجم وإمام والتف حولهما المثقفون والصحفيون خاصة بعد أغنية: "أنا أتوب عن حبك أنا؟"، ثم "عشق الصبايا"، و"ساعة العصاري"، واتسعت الشركة فضمت عازف الإيقاع محمد على، فكان ثالث ثلاثة كونوا فرقة للتأليف والتلحين والغناء ساهم فيها العديد لم تقتصر على أشعار نجم فغنت لمجموعة من شعراء عصرها أمثال: فؤاد قاعود، ونجيب سرور، و توفيق زياد، وزين العابدين فؤاد، وآدم فتحى، وفرغلى العربى، وغيرهم.


نيجي بقي للحزء المهم من الموضوع و هو التعرف علي فن الشيخ امام و بعض أغانيه

أول أغنية معانا هي أغنية >> البحر بيضحك ليه

استماع



كلمات : أحمد فؤاد نجم
ألحان : الشيخ إمام


البحر بيضحك ليه وانا نازلة اتدلع املا القلل
البحر غضبان ما بيضحكش
أصل الحكاية ما تضحكــش
البحر جرحه ما بيدبلش وجرحنا ولا عمره دبل
***
مساكين بنضحك من البلوة زي الديوك والروح حلوة
سارقاها من الســـــكين حموة و لسه جوا القلب أمل
***
قللنا فـــخارها قناوي بتقول حكاوي و غــناوي
يا قلة الذل أنا ناوي ما اشرب و لو في المية عسل

***
يـــاما ملينا وملينا لغيرنا وعطــــشنا ساقينا
صابرين وبحر ما يروينا شايلين بدال العلة علل
***
في بالي ياما وعلى بالي واللي بيعشق ما يبالي
ما يهمنيش من عزالي يا حلوة لو مرسالي وصل
***
بيني وبينك ســور ورا سور وانا لا مارد ولا عصفور
في إيدي عود قوال وجسور وصبحت انا في العشق مثل



بالذمة في أجمل من كدة كلام

نيجي للأغنية اللي بعدها عطشان يا صبايا

استماع



كلمات : أحمد فؤاد نجم
ألحان : الشيخ إمام

عطشان يا صبايا وانا عاشق .. ع السبيل
عطشان والميه ف بلدي على عكس ما يجري النيل
والنخل العالي مطاطي والجذع الواطي دليل
والريح العاكس كابس والريح العاطي بخيل
والنسمه اتعكر لونها من هم الناس يا خليل

عطشان والنيل في بلدنا والزرع اخضر وجميل
وانا كنت امبارح خالي واليوم دا صبحت عليل
عطشان ودوايا حبيبي يسقيني العشق دليل
ودليل الحب .. عمايل وكلام الحب قليل
وانا كل ما أقول التوبه تغويني .. المواويل
تطرح في القلب جناين تفقس فيها الزغاليل
عشاق يا حمام الغيه ولا فيش قدامنا بديل
سكه ومحسوبه علينا نمشيها جيل ورا جيل
ع الشوك نفرد خطاوينا
في الليل تضوي القناديل
حوالينا قلوب حبابه ومعانا العقل دليل
والشمس تصب صبابه
والمنبع نهر النيل
وان لاموا علينا يلوموا
ما لهمش علينا سبيل
ما هو شوك العشق ملامه
والشوك في الورد أصيل
ودوني ع السبيل
ودوني ع السبيل


بالذمة في أرقي من كدة كلام؟

الأغنية التالتة أغنية اتجمعو العشاق اللي بتوصف أيام المعتقلات السياسية و كيف كان الناس اللي بتحاول تتكلم في حب مصر كانت بتتجمع في الزنازين
اتلأغنية معبرة عن حب عظيم لمصر و تشبيهات في منتهي القوة و الروعة فعلا تستحق الاستماع

كلمات : أحمد فؤاد نجم
ألحان : الشيخ إمام

اتجمعوا العشاق في سجن القلعة ... اتجمعوا العشاق في باب الخلق

و الشمس غنوة من الزنازن طالعة .. و مصر غنوة مفرعة في الحلق

تجمعوا العشاق بالزنزانة .... مهما يطول السجن مهما القهر

مهما يزيد الفجر بالسجانة .. مين اللي يقدر ساعة يحبس مصر

...............

تجمعوا و العشق نار في الدم ..... نار تحرق الجوع و الدموع و الهم

نار تشتعل لما القدم ينضم .... لما الايادي تفور في لم اللحم

و اللحم متنتور في رملة سينا .... و الكدب بيحجز على أيادينا

قدم العدو غارسة في لحم ترابي ... و الكدب عشش مخبرين على بابي

و المخبرين خارجين كلاب سعرانة ... بيجمعوا العشاق في الزنزانة 


...............

مصر النهار يطلقنا في الميادين .. مصر البكا .. مصر الغنا و الطين

مصر الشموس الهالة من الزنزانين .. هالة و طارحة بدمنا بسا تين 

مصر الجناين طرحة مين يقطفها .. مصر الجناين للي يرفع سيفها

مهما يطول السجن مهما القهر .. مهما يزيد الفجر بالسجانة

مين اللي يقدر ساعة يحبس مصر


الأغنية الرابعة اذا الشمس غرقت

استماع



كلمات : أحمد فؤاد نجم
ألحان : الشيخ إمام

إذا الشمس غرقت

في بحر الغمام

ومدت على الدنيا موجة ظلام ومات البصر

في العيون والبصاير

وغاب الطريق

في الخطوط والدواير

يا ساير يا داير

يا ابو المفهومية

مفيش لك دليل

غير عيون الكلام


نيجي للأغنية الخامسة و هي أغنية جيفارا مات اللي كان بيرثي فيها جيفارا .. أو بالمعني البعيد بيرثي فيها معني البطولة و النضال

استماع



كلمات : أحمد فؤاد نجم
ألحان : الشيخ إمام

جيفارا مات

آخر خبر في الراديوهات

وفي الكنايس والجوامع

وفي الحواري والشوارع

وع القهاوي وع البارات

جيفارا مات.. جيفارا مات

واتمدّ حبل الدردشة والتعليقات

مات المناضل المثال

يا ميت خسارة ع الرجال

مات الجدع فوق مدفعه جوّا الغابات

جسّد نضاله بمصرعه ومن سكات

لا طبالين يفرقعوا ولا إعلانات

ما رأيكم دام عزكم يا أنتيكات

يا غرقانين

في المأكولات والملبوسات

يا دفيانين ومولّعين الدفايات

يا محفلطين يا ملمعين

يا جيمسينات

يا بتوع نضال آخر زمن في العوامات

ما رأيكم دام عزكم.. جيفارا مات

لا طنطنة ولا شنشنة

وإعلانات واستعلامات

عيني عليه ساعة القضا

من غير رفاق تودعه

يطلع أنينه يزعق ولا مين يسمعه

يمكن صرخ من الألم

من لسعة النار في الحشا

يمكن ضحك أو ابتسم

أو ارتعش أو انتشى

يمكن لفظ آخر نفس

كلمة وداع لأجل الجياع

يمكن وصية للي حاضنين

القضية في الصراع

صور كثير ملّو الخيال

وألف مليون احتمال

لكن أكيد ولا جدال

جيفارا مات موتة رجال


كمان معانا أغنية من أجمل أغانه و هي أغنية مصر يامة يا بهية و طبعا لا تعليق

استماع



كلمات : أحمد فؤاد نجم
ألحان : الشيخ إمام

يسبق كلامنا سلامنا يطوف ع السامعين معنا

عصفور محندق يزقزق كلام موزون و له معنى


عن الارض سمرا و قمرا

و ضفه و نهر و مراكب


و رفاق مسيرة عسيرة

و صورة حشد

و مواكب

ف عيون صبية بهية

عليها الكلمة و المعنى
***
مصر يا امّة يا بهية

يام طرحة و جلابية

الزمن شاب و انتي شابة

هو رايح و انتي جاية

جايه فوق الصعب ماشية

فات عليكي ليل و مية (100)

و احتمالك هو هو

و ابتسامتك هي هي

تضحكي للصبح يصبح

بعد ليلة و مغربية

تطلع الشمس تلاقيكي

معجبانية و صبية

يا بهية***

الليل جزاير جزاير

يمد البحر يفنيها

و الفجر شعلة ح تعلا

و عمر الموج ما يطويها

و الشط باين مداين

عليها الشمس طوافة

ايدك في ايدنا

ساعدنا

دي مهما الموجة تتعافى

بالعزم ساعة جماعة

و بالأنصاف نخطيها
***
مصر يا امّة يا سفينة

مهما كان البحر عاتي

فلاحينيك ملاحينيك

يزعقوا للريح يواتي

اللي ع الدفة صنايعي

و اللي ع المجداف زناتي

و اللي فوق الصاري كاشف

كل ماضي و كل آتي

عقدتين و التالته تابتة

تركبي الموجة العفية

توصلي بر السلامة

معجبانية و صبية.. يا بهية

***
و يعود كلامنا في سلامنا يطوف ع الصحبة حلواني

عصفور محني يغني

على الأفراح ومن تاني

يرمي الغناوي تقاوي

تبوس الأرض

تتحنى

تفرح

و تطرح

و تسرح

و ترجع تاني تتغنى

اللي بنى مصر كان في الأصل حلواني


أظن مفيش بعد كدة كلام في حب مصر
الله يرحمك يا شيخ امام يا جميل

و دي أغنية شيّد قصورك اللي بتصور الفساد و التسلط

استماع



كلمات : أحمد فؤاد نجم
ألحان : الشيخ إمام

شيد قصورك ع المزارع

من كدنا وعمل إيدينا

الخمارات جنب المصانع

والسجن مطرح الجنينة

واطلق كلابك في الشوارع

واقفل زنازينك علينا

وقلّ نومنا في المضاجع

أدي احنا نمنا ما اشتهينا

واتقل علينا بالمواجع

احنا اتوجعنا واكتفينا

وعرفنا مين سبب جراحنا

وعرفنا روحنا والتقينا

عمال وفلاحين وطلبة

دقت ساعتنا وابتدينا

نسلك طريق مالوهش راجع

والنصر قرّب من عنينا

النصر أقرب من إدينا


و أغنية صباح الخير على الورد اللي فاح في جناين مصر .. اللي كأنه عملها مخصوص للثورة المصرية !!
القصيدة اللي كتبها الفاجومي من داخل سجن القلعة عام 1973

استماع



صباح الخير على الورد اللي فتح
في جناين مصر
صباح العندليب يشدي
بألحان السبوع يا مصر
صباح الداية واللفة
ورش الملح في الزفة
صباح يطلع بأعلامنا
من القلعة لباب النصر

***

سلامتك ياما يا مهرة
يا حبالة
يا ولادة
يا ست الكل يا طاهرة
سلامتك
من آلام الحيض
من الحرمان
من القهرة
سلامة نهدك المرضع
سلامة بطنك الخضرا
هناكي وفرخة الوالدة
تضمي الولد
يا والدة
يصونهم لك
ويحميهم
يكترهم
يخليهم
يجمع شملهم
بيكي
يتمم فرحتك بيهم

***

صباح الخير على ولادك
صباح الياسمين والفل
تعيشي ويفنوا حسادك
ويسقوهم كاسات الذل
وبلغ يا سمير غطاس
يا ضيف المعتقل سنوي
بصوتك ده اللي كله نحاس
صباح الخير على الثانوي
وأهلاً بيكو في القلعة
وباللي في الطريق جايين
ما دامت مصر ولادة
وفيها الطلق والعادة
حتفضل شمسها طالعة
برغم القلعة والزنازين

و ننهي الموضوع مع بعض بأغنية يا فلسطينية من أروع أغانيه

استماع



و طبعا كلمات : أحمد فؤاد نجم
ألحان : الشيخ إمام

يا فلسطينية و البندقاني رماكو ..

بالصهيونية تقتل حمامكو فِ حماكو

يا فلسطينية و أنا بدي أسافر حداكو

ناري بإيديا و إيديا تنزل معاكو

على راس الحية و تموت شريعة هولاكو

............

يا فلسطينية و الغربة طالت كفايا

و الصحرا أنّت من اللاجئين و الضحايا

و الارض حنّت للفلاحين و السِقايا

و الثورة غاية و النصر أول خطاكو

........

يا فلسطينية و الثورة هيَّ الاكيدة

بالبندقية نفرض حياتنا الجديدة

و السكة مهما طالت و بانت بعيدة

مد الخطاوي هو اللي يسعف معاكو

.........

يا فلسطينية فيتنام عليكو البشارة

بالنصر طالعة من تحت مية ألف غارة

و الشمعة والعة و الامر كان بالخسارة

راجعين حيارى عقبال ما يحصل حداكو


اتمني ماكونش طولت عليكم في الموضوع

و أتمني منكم تسعو الاغاني و تتعرفو علي فن الشيخ امام لأنه فعلا يستحق

دا تراث لا يموت أبدا

الله يرحم الشخ امام و يعيد علينا 100 شيخ امام مثله

و أخيرا يجب ذكر المصدر عند النقل لأن الوضوع مجهود شخصي


حدوتة مصرية

ليست هناك تعليقات:

إرسال تعليق

;