6/04/2011

انا رحت القلعة و شفت ياسين - الشيخ إمام ، الفاجومي


قصيدة انا رحت القلعة و شفت ياسين
للشاعر الثائر احمد فؤاد نجم
عن معتقل سجن القلعة للطلبة الثوار

انا رحت القلعة و شفت ياسين
حواليه العسكر و الزنازين
و الشوم و البوم
و كلاب الروم
يا خسارة يا أزهار البساتين
عيطي يا بهية على القوانين

انا شفت شباب الجامعة الزين
احمد و بهاء ، و الكردي و زين
حارمينهم حتى الشوف بالعين
و ف عز الضهر مغميين
عيطي يا بهية على القوانين

و قابلت سهام ، في كلام إنسان
منقوش و مأثـّـر في الجدران
عن مصر و عن عمال حلوان
مظاليم العهد المعتقلين
عيطي يا بهية على القوانين

و قابلت هناك ، منذر و زياد
و قابلت كمان عزت و جواد
أربع أبطال ، شنقوا الجلاد
"التل" يهوذا الفدائيين
زغرطي يا بلدنا لدول مساجين

و اسمعي يا بلدنا خلاصة القول
و بقولك أهه و أنا قد القول
مش ممكن كده حيحول الحول
على كده و الناس يفضلوا ساكتين
خليكوا فاكرين
خليكوا شاهدين
انا رحت القلعة و شفت ياسين

القصيدة غناء الشيخ إمام عيسى

ليست هناك تعليقات:

إرسال تعليق

;